Actualidad LGTBIQ+
O PSOE na Coruña leva catro anos sen pendurar a bandeira LGTBIQA+ na fachada do Concello

Por cuarto ano consecutivo, o Concello da Coruña non pendura a bandeira LGTBIQA+ na fachada do edificio situado na Praza de María Pita, algo que convertérase en costume durante os anos que estivo na corporación municipal a Marea Atlántica (2015-2019). A explicación que dan dende o Concello é que a fachada está nun estado ruinoso e que pode danarse. Mais isto contrasta co sucedido noutras ocasións durante estes anos e que denunciou o 28 de xuño, Día do Orgullo, ALAS Coruña nas súas redes sociais. Este colectivo lembra que durante os últimos anos téñense colocado tanto luces de Nadal como altofalantes para as festas.

Un ano máis, e xa van catro a 🏳️‍🌈 non colga da balconada do @ConcelloCoruna
Esta institución gobernada polo PSOE escudase na protección da fachada pero ...
🧵Dentro fío 👇 #Orgullo2023 pic.twitter.com/Qh80E3CS6u

— ALAS A Coruña (@alasacoruna) June 28, 2023

Pola sua banda, o activista cuir feminista Pablo Maribolherx comenta que “PHoto España, por exemplo, fixo unha exposición no ano 2020 con dous carteis enormes pendurados da fachada. Calquera estudante de Arquitectura pode dar unha idea de como pendurar algo sen danar a fachada. Hai moitos medios: podes proxectar todas as noites unha bandeira sobre o edificio. Solucións hai moitas, vontade política ningunha. Son  catro anos invisibilizando a nosa bandeira, non sei que sentido ten.”

O PSOE en Coruña, co tema LGTBIQA+, sempre destacou por un intento de apropiación, sinala Pablo Maribolherx

Este histórico activista da cidade polos dereitos LGTBIQA+ engade que o asunto da bandeira é unha mostra máis “das políticas de desidia do PSOE na Coruña co tema LGTBIQA+. Sempre destacou por un intento de apropiación, para conseguir o voto rosa ou como queiras chamalo, sen deixarnos aos colectivos celebrar o Orgullo á nosa maneira, ser autónomos, iso nunca lles interesou”. Denuncia, ademais, que a actitude do Goberno socialista sempre foi “quen estea comigo fai parte do Orgullo da Coruña, quen estea comigo terá cartos, terá convenios co Observatorio de Igualdade do Concello”. Continúa dicindo que “as políticas de diversidade nos últimos anos nesta cidade son nefastas, teñen o Espazo Diverso totalmente parado, sen actividades. No seu momento tiñan un orzamento de 40.000 euros e non se gastaban nin 10.000. Seino porque dirixín o espazo un tempo”.

O Espazo Diverso é un servizo municipal creado durante a alcaldía da Marea Atlántica (2015-2019) para atender, visibilizar e organizar actividades cos colectivos LGTBIQA+ na cidade durante todo ano. De feito, dende varios destes colectivos coruñeses sinalan que “dende o Concello apóstase e publicítase unicamente o festival Atlantic Pride, non o propio Orgullo en si. Este festival está vinculado unicamente a barras, alcohol e festa, que pode ser necesario pero non é o único que se debe reivindicar nesta época. Trátase dunha entidade –a asociación ORCO (Orgullo Coruña)– que leva unha morea de cartos públicos por organizar un festival durante unha semana ao ano. Pero logo as entidades que traballamos o resto do ano non recibimos esa visibilidade dende o Concello”. Por iso, dende ALAS Coruña sinalan que “este ano decidimos non participar nas actividades do Orgullo organizadas polo Concello, porque xa levamos tempo denunciando esta falta de interese. Por exemplo, ata o mesmo día de hoxe (28 de xuño) o Concello non publicara ningunha actividade.” Neste mesmo senso, Pablo Maribolherx coincide en que o Concello “só publica as cousas no último día, ou no mellor dos casos na última semana. Non lles interesan as datas reivindicativas. Non mostra interés en traballar ben estas cuestións. Repito, é falta de vontade e desidia, aínda non sei moi ben o motivo. Ademais o festival non deixa de ser unha actividade con fins lucrativos, organizada por unha asociación con intereses na hostalería.”

Lembremos que o festival Atlantic Pride, de carácter gratuíto, é unha actividade que contará este ano 2023 coa actuación de 35 artistas, locais e internacionais, repartidos en tres escenarios da cidade: Praza de Pontevedra, Fundación Luís Seoane e Xardíns de Méndez Núñez. A vindeira edición, programada para principios de xullo, foi presentada pola propia alcaldesa Inés Rey nun acto público onde destacou o éxito de pasadas edicións. Pola súa banda, ALAS Coruña, xunto cos distintos grupos da oposición, asinou o pasado mes de maio 9 compromisos para, entre outras cousas, “abandonar o actual modelo mercantilista do Orgullo LGTBIQA+ na cidade”.