CRTVG - Corporación Radio y Televisión de Galicia
O TSXG condena a CRTVG por minimizar a folga das mulleres no 8 de marzo

O pasado 8 de marzo as mulleres pararon para denunciar a precariedade dos traballos e dos espazos que protagonizan no cotián. Coa vontade de demostrar que “o mundo para cando paran as mulleres”, varios sindicatos convocaron paros de dúas horas. Outros, como Unión Anarcosindicalista, CGT, CNT e CUT, mantiveron unha convocatoria de paro continuado de 24 horas.

A Corporación de Radio e Televisión de Galicia foi unha das empresas onde se rexistrou máis seguemento (próximo ao 80%, segundo datos da CUT). Como moitas outras compañeiras, a condutora do espazo Galicia Noticias Mediodía adheriu á folga, mais a dirección da CRTVG mantivo na grella o programa, colocando no seu lugar un presentador varón, minimizando así os efectos da folga.

Ante a demanda presentada polo sindicato CUT fronte a esta obstrución da folga, o Tribunal Superior de Xustiza de Galiza emitiu unha contundente sentenza na que resolve a “vulneración do dereito á folga da CUT como central convocante da folga xeral de 24 horas en Galicia, ao ter aminorado a empresa o efecto da folga mediante a sustitución dunha traballadora folguista”. O TSXG tamén condena á empresa demandada a abonar ao sindicato unha indemnización de danos e prexuízos por importe de 15.625,50 euros. Deste xeito, o TSXG ratifica a cobertura legal da folga de 24 horas: “el hecho de la emisión del programa Galicia Noticias Mediodía, supuso una sustitución de trabajadora huelguista con merma de la consecuente presión que el sindicato CUT –unha das centrais sindicais convocantes do paro 24 horas en Galicia– pretendía realizar en el ejercicio legítimo de un derecho constitucional.”

Especial protección

Esta sentencia establece un criterio xurídico innovador, pois por primeira vez un Tribunal se manifesta sobre as folgas feministas do 8 de marzo, delimitando unha especial protección do obxecto desta convocatoria, ao manifestar que “su cara visible es una trabajadora mujer, y no un varón. De lo que se trataba en definitiva, como señala el sindicato demandante, era visibilizar las consecuencias de la ausencia de las mujeres trabajadoras en sus puestos de trabajo, consecuencias que no son visibles si la ausencia de dicha trabajadora fémina es suplida por un trabajador varón.”

A Secretaría das Mulleres da Central Sindical manifesta a súa satisfacción polo que considera “unha vitoria de todas” agradecendo especialmente o papel “das valentes traballadoras da CRTVG, compañeiras que nos defenderon a todas denunciando este caso, que loitaron por todas nós con esforzo e coraxe”. Lanzan unha mensaxe de “orgullo das nosas compañeiras, dos feminismos galegos e desta Secretaria das Mulleres desde a que continuaremos construindo a favor dunha transformacion colectiva en clave de feminismo de clase”. Ao tempo agradece “ao movemento feminista, e á loita das mulleres no día a día, pola que se chegou á folga de 24 horas do 8 de marzo. De non ser por iso, por elas, non teriamos esta celebración. A loita é de todas, a vitoria tamén.”