Sergas
A Xunta pagará un extra aos médicos que acorten as baixas dos seus pacientes

O Servizo Galego de Saúde (Sergas) comezou a vincular parte do complemento de produtividade dos médicos de atención primaria ao control da duración das baixas laborais dos seus pacientes, segundo adiantou La Voz de Galicia, tras unha filtración da Xunta de Galiza. A medida aparece recollida nos Acordos de Xestión (AdX) que cada ano fixa a administración sanitaria galega e que condicionan o cobro de incentivos salariais variables por parte dos facultativos.

De acordo coa documentación filtrada ao xornal galego, o Sergas avaliará aos médicos en función de se as incapacidades temporais que tramitan se manteñen dentro dos tempos considerados “óptimos” pola Seguridade Social. Nalgunhas áreas sanitarias, o criterio consistirá en que a duración media das baixas asinadas por cada profesional non supere os prazos establecidos no Manual de Tempos Óptimos de Incapacidade Temporal; noutras, esixirase que polo menos o 80% dos procesos estean por baixo da media da zona sanitaria correspondente.

O complemento de produtividade variable para médicos de familia ascende este ano a 2.491 euros anuais, e o apartado vinculado ao control das baixas pode representar entre un 10% e un 15% do total, é dicir, até 374 euros ao ano. Ademais do impacto económico inmediato, o cumprimento destes obxectivos inflúe tamén na progresión da carreira profesional, que repercute de forma permanente no salario dos facultativos.

Varios médicos consultados por O Salto cuestionan a medida e advirten de que a duración de moitas baixas depende de factores alleos á atención primaria, como as listas de espera hospitalarias, as probas diagnósticas pendentes ou a evolución clínica de cada paciente.

Desde o Sergas defenden, porén, que a incapacidade temporal forma parte da actividade asistencial e que, polo tanto, a súa xestión pode incluírse dentro dos indicadores avaliables. A Consellería de Sanidade sostén que o obxectivo é favorecer a recuperación “o máis axiña posible” das persoas traballadoras en situación de baixa.

A decisión enmárcase na estratexia impulsada pola Xunta para reducir a duración das incapacidades temporais en Galiza, unha das comunidades onde as baixas teñen unha duración media máis elevada, con 77,1 días segundo datos da Seguridade Social. Nos últimos meses, a administración autonómica intensificou as reunións entre inspectores sanitarios e médicos de cabeceira e acaba de aprobar a incorporación de 18 novos inspectores médicos.

A principal asociación de medicina de familia rexéitaa

A Asociación Galega de Medicina Familiar e Comunitaria (Agamfec) criticou a decisión do Sergas, que considera unha medida “simplista” para abordar un problema complexo. A entidade admite que o sistema de xestión de baixas laborais precisa cambios, pero denuncia que a presión volve recaer sobre a atención primaria mentres permanecen intactas outras deficiencias estruturais do sistema sanitario.

A organización profesional sostén ademais que o novo criterio contradí o discurso da Xunta sobre unha maior implicación da atención hospitalaria nos procesos de incapacidade temporal e reforza a idea de que toda a responsabilidade segue depositándose nos médicos de familia.

Agamfec reclama unha análise máis detallada e compartida entre todos os niveis asistenciais implicados, xa que, ao seu xuízo, utilizar unicamente a duración media das baixas como indicador non permite distinguir adecuadamente entre situacións xustificadas e atrasos evitables.

A asociación conclúe que este tipo de medidas evidencian que a principal preocupación da administración está máis vinculada ao custo económico e ao impacto sobre a produtividade que á saúde das persoas pacientes, que debería ser —afirman— a prioridade do sistema sanitario.