Sanidad pública
O PP rexeita a ILP para salvar a atención primaria e descalifica á Plataforma SOS Sanidade Pública

A Plataforma SOS Sanidade Pública e os moitos colectivos en defensa da sanidade que a integran estiveron esta mañá no Parlamento Galego para debater a Iniciativa Lexislativa Popular para fortalecer a Atención Primaria galega. Unha iniciativa que acadou máis de 55.000 sinaturas en todo o país e que a sitúa como a que maior respaldo social obtivo na historia, logo de meses de fortes mobilizacións, que contaron coa implicación de máis de 30 plataformas constituídas en toda Galiza para defender a Atención Primaria.

Lembremos que a ILP, segundo as plataformas sanitarias, recollía medidas racionais, factibles e aplicables de maneira inmediata para rematar coas trabas e dificultades para acceder aos centros de saúde e para mellorar as condicións laborais do persoal sanitario de Atención Primaria e do resto do SERGAS. Na actualidade denuncian que pode pasar máis dunha semana de espera para ser atendido no médico de cabeceira, ou ben que se prioricen as consultas telefónicas en lugar de presenciais e que moitos servizos de urxencias e PACs continúen pechados ou sen servizos mínimos, entre outras cuestións.

Unha ILP para salvar a atención primaria na sanidade galega

Xabi Lombardero

Sanidad pública

Unha ILP para salvar a atención primaria na sanidade galega

Xabi Lombardero

O pasado 26 de abril diversos colectivos en defensa da sanidade pública mobilizáronse en máis de 20 localidades para conseguir que a Xunta aprobe a Iniciativa Lexislativa Popular que actualmente está en trámite no Parlamento Galego.

Se cadra o máis salientable do acontecido esta mañá no Parlamento teña que ver coa actitude do grupo popular fronte á ILP, que sabían que ían tombar coa súa maioría. Pois nin o presidente Rueda nin o concelleiro de Sanidade, Julio García Comesaña —que leva máis de dous anos sen recibir á Plataforma SOS Sanidade Pública— participaron no debate, deixando ao deputado Alberto Pazos Couñago lanzar duras acusacións cara a propia plataforma por partidista. Pois, segundo o exposto polo deputado popular na tribuna do Parlamento, SOS Sanidade Pública trátase “dunha sucursal do bipartito” e a ILP “non contempla ningunha solución aos problemas” e “só pretende salvar o falso relato da esquerda” pero non “salvar a sanidade pública”.

Pola súa banda, Vanessa Viquendi foi a encargada de defender o texto no pleno da Cámara. Como integrante da plataforma e presidenta do colectivo Pediatras e Matronas Xa! lembroulle ao deputado popular que ela “non milita en ningún partido” e que a iniciativa lexislativa “conta con medidas como fixar un máximo de 48 horas de espera para consultas nos centros de saúde, subir ata o 25% do gasto total sanitario adicado á Atención Primaria e que se tratan de medidas en favor de toda a cidadanía galega, non en contra de ninguén.”

A ILP recolle medidas en favor de toda a cidadanía galega, non en contra de ninguén, lembran dende SOS Sanidade

Mentres o debate continuaba na cámara, numerosos integrantes da plataforma manifestábanse diante da mesma e agardaban ao resultado da votación. Os grupos da oposición, tanto PSdeG coma BNG, respaldaron a iniciativa e acusaron ao PP de falta de diálogo e de querer continuar coa súa política de desmantelamento da Atención Primara e do sistema sanitario público galego.

Unha vez concluída a votación diferentes representantes das plataformas sanitarias lembraron coma o PP escondeu no debate os dous anos en que SOS Sanidade Pública estivo a participar no Consello Técnico do Sistema de Saúde de Galicia e que presentou un proxecto para un novo modelo de Atención Primaria “que o SERGAS gardou nun caixón”. Ademáis, quixeron engadir que “entendemos que o PP este en desacordo coa ILP, pero non que insulte e ataque ás miles de persoas que a apoiaron para facer frente á situación de precariedade dos centros de saúde, dos puntos de atención continuada (PACs) ou dos servizos de pediatría e matronas, que se atopan sen persoal nin recursos necesarios para atender á poboación”.