Política
O PP publica unha montaxe vinculando a Ana Pontón con ETA e axitando a conspiración de Atocha

No Día Europeo das Vítimas do Terrorismo, celebrado cada 11 de marzo en lembranza das 193 persoas asasinadas nos atentados de Atocha de 2004, o Partido Popular de Galicia decidiu publicar nas súas redes sociais unha lembranza singular: un vídeo manipulado e con montaxes no que o presidente da Xunta, Alfonso Rueda, suxire a vinculación ficticia do BNG e da súa líder, Ana Pontón, coa banda terrorista ETA.

O clip, de apenas 37 segundos, aproveita para meter nun mesmo saco o atentado de Atocha —no que tamén resultaron feridas 2.057 persoas—, as vítimas de ETA e cortes de vídeo sacados de contexto nos que a líder do BNG parece rirse na sesión deste mércores no Parlamento de Galicia. Ademais, a propia portada do vídeo tamén é unha imaxe manipulada na que o PP superpón a Pontón sobre unha das clásicas imaxes dos comunicados dos membros de ETA.

De maneira máis sutil, case por concatenación de enunciados, o presidente Rueda retoma a conspiración abandeirada polo entón presidente do Goberno, José María Aznar, ao sobreimprimir imaxes dos rescates das vítimas na estación madrileña en 2004 con mencións a ETA, sen sinalar, iso si, os autores materiais reais: unha célula independente vinculada ao terrorismo yihadista.