Ourense
Jácome anuncia a rescisión do contrato dos praceiros de Ourense en vésperas de Nadal

A finais de 2017, o Concello de Ourense adxudicou as obras dun edificio provisional na Alameda para trasladar temporalmente aos praceiros mentres se reformaba o mercado municipal. Tratábase dun emprazamento provisional, previsto para os 22 meses que inicialmente ía durar a reforma do edificio da Praza de Abastos.

A Asociación de Comerciantes e Industriais da Praza de Abastos asinou un convenio para saír do edificio mentres duraban as obras. Sete anos despois, o edificio municipal, que custou cinco millóns de euros, permanece inacabado.

“Está completamente baleiro“, denuncia Mari Carmen, unha das praceiras. A remodelación da Praza de Abastos dispoñía inicialmente dunha subvención europea de tres millóns de euros. "Non se presentaron facturas; polo que se perdeu a subvención“, explica. O resultado foi un sobrecusto de dous millóns de euros.

A Praza non dispón de subministración de auga nin electricidade, nin sumidoiros, nin zona de carga e descarga, nin cuarto de basuras. Uns investimentos indispensables que a asociación estima en dous millóns de euros. "O Concello di que non está disposto a poñer absolutamente nada, a pesar de que é un edificio municipal”, lamentan dende a Asociación de Comerciantes.

Ante o bloqueo, os praceiros tentaron artellar unha solución para completar a financiación das obras. O Goberno autonómico comprometeuse a aportar 1,4 millóns de euros, mentres que a Deputación de Ourense engadiría outros 200.000 euros. A Asociación de Comerciantes asumiría os 400.000 euros restantes. A condición era que o Concello prorrogase a concesión para permitirlles amortizar a súa achega, tal e como recolle o contrato.

A proposta foi rexeitada polo alcalde; e os praceiros teñen claro que, detrás da súa intransixencia, se agochan outros intereses. “Entendemos que o que quere é adxudicar o edificio a outro operador. Entón, o seu interese legal vai dando pasos de cara a rescindir o contrato da concesión”, afirman. A Asociación emprendeu accións legais e incluso presentou un novo proxecto cunha redistribución dos postos, ao que o alcalde “non respondeu absolutamente nada”.

A situación empurrou os comerciantes ao límite. “Estamos a falar de 200 familias que dependen directamente do seu posto na praza, ademais de todos os traballadores ao seu redor: distribuidores, empresas de manufactura, bolsas, papel, caixas...”, lembran.

O xoves 27 de novembro a Xunta de Goberno Local aprobou o desaloxo forzoso dos comerciantes da Alameda. A decisión dálle 30 días aos praceiros para abandonar o lugar, sen alternativa viable, xa que o edificio histórico segue sen postos habilitados nin suministros básicos. 

Un día despois, Pérez Jácome deu un paso máis e anunciou o inicio dos trámites para resolver o contrato da Praza de Abastos por “incumprimento grave”. Os praceiros lembran que foi o Concello quen incumpriu o convenio orixinal. "O documento asinado establecía que volveríamos á Praza nas mesmas condicións que tiñamos. Nada diso se cumpriu“. Ademais, insisten en que a situación do edificio non é compatible coa súa actividade: “Aquí temos que cumprir unhas normas sanitarias”.

Gonzalo Pérez Jácome xa non se limita a desaloxar o espazo provisional, senón que avanza para cancelar os dereitos de concesión que aínda lle quedan aos praceiros. Esta estratexia, segundo os comerciantes, confirma que o obxectivo real é desposuír ás familias locais dos seus postos para facilitar a entrada dun novo operador.

Mari Carmen advirte de que a decisión municipal pode ter un forte impacto económico para toda a cidade. Un eventual desaloxo obrigaría o Concello a indemnizar a todos os praceiros, o que suporía retirar fondos das arcas municipais que, segundo sostén, deberían destinarse a outras obras e servizos necesarios. “As accións do alcalde van repercutir en todos os ourensáns”, insiste.

Ademais, denuncian que o momento elixido para anunciar o desaloxo non é casual. “O que busca é arruinarnos, porque solta todo isto ás vésperas do Nadal”, critican dende a Asociación. A campaña do Nadal é a época de maior actividade comercial do ano para os praceiros, polo que consideran que a medida non só é inxusta, senón tamén devastadora para a súa supervivencia económica.