Ourense
Condenado a dous anos de cárcere o alcalde de Verín do PSOE

A Audiencia Provincial de Ourense condenou a Gerardo Seoane, alcalde de Verín que foi elixido nas listas do PSdeG-PSOE, a dous anos de cárcere e á inhabilitación para o exercicio do dereito de sufraxio pasivo por un delito contra a ordenación do territorio. Esta condena impediralle ocupar cargos públicos mentres dure a pena.

A sentenza, que pode ser recorrida ante o Tribunal Superior de Xustiza de Galiza (TSXG), si o exime do delito de prevaricación urbanística polo que se lle acusaba en relación con unhas obras realizadas preto dunha igrexa de Verín.

A sección segunda do tribunal provincial impúxolle ademais unha multa de 2.500 euros e un ano de inhabilitación para exercer como promotor de obras. Os maxistrados consideran acreditado que o alcalde, que é arquitecto, impulsou a execución das obras sen presentar o proxecto técnico correspondente.

Tamén censuran que non dispuxera da autorización obrigatoria da Consellería de Cultura, imprescindible ao levarse a cabo os traballos na zona de protección da Igrexa de San Bartolomeu, que figura no catálogo do Plan Xeral de Ordenación Municipal (PXOM) de Verín de 2012 e no Catálogo do Patrimonio Cultural de Galiza.

Non obstante, o tribunal rexeita por insuficiencia probatoria que o acusado demolera restos do inmoble en ruínas e construíra un novo muro de bloques, aínda que si confirma que as obras “non son de escasa complexidade técnica” e, en consecuencia, “non poden considerarse obra menor nin de conservación”, aspectos “necesariamente coñecidas” polo alcalde, segundo recolle o fallo.

A resolución xudicial establece que as obras se executaron “por exclusiva iniciativa” do alcalde, “ás costas da corporación municipal” e “comportaron afectación importante no ben protexido”, ao implicar movemento de terras, realización de canalizacións e introdución de arquetas e cambio de aliñacións.

A continuación, os maxistrados razonan que “a figura do alcalde” desempeña “un papel crucial” na ordenación do territorio e que, por iso, “é o encargado de velar” polo “cumprimento da normativa” e de “representar os intereses da comunidade” na xestión do territorio.

O dirixente defendeu a súa “inocencia” e asegurou que recorrerá a sentenza no Tribunal Superior de Xustiza de Galiza.