Música
O FNL vigués, o apoio á música emerxente

O Festival Nun Local non é un deses grandes festivais de verán aos que acoden milleiros de persoas. Máis ben, é un deses festivais alternativos. Deses nos que importa máis dar a coñecer a nova arte xurdida que traer un grande aforo de persoas.

O festival nos seus catro días de duración trae todo tipo de artistas: grupos de música folclórica galega, punk-rock, tradicional senegalesa, fados, teatros, comedias, etc. Todo por dar un impulso á cultura local cun feedback coa propia cidade, xa que as actuacións fanse nos bares típicos da zona vella da cidade de Vigo. Incluso se lle dá importancia a artes coma a fotografía impulsada polos grupos. Foi o caso de 'Os Meninos' sostendo carteis ao seu redor da exposición fotográfica de O Vigo que non sorrí en colaboración á asociación "Os ninguéns".

O festival é independente en termos económicos, é dicir, é autofinanciado. Non ten (até agora) apoios institucionais ou privados. Sinala "Eddie": "De non ser polo autofinanciamento poderiamos estar neste 2018 aínda agardando para organizar a primeira edición". Aínda así, o festival ten o seu propio merchandising, coma a venda de chapas feitas por artesáns locais a man. Os artistas non cobran directamente pola actuación, senón que o festival les paga os custos a través dunha cota de participación que paga cada local que participa. Eddie conclúe: "É importante que a xente saiba que existan persoas capaces de facer cousas así por motivos que non sexan económicos, pero sería unha idiotez dicir que non nos gustaría poder remunerar o noso traballo".

A evolución do festival, polo xa pasaron máis de 400 artistas nos últimos 4 anos, pasa pola cohesión coa comunidade. As actuacións do festival sempre son polo día, para non molestar a xente do barrio pola noite. En canto á escolla dos artistas para os locais, sinalan desde a organización: "As preguntas que nos facemos son: que vai sacar á xente das súas casas? Que os vai facer quedar fóra? E... que os vai estimular? Debemos crear unha oferta cultural moi forte e unha experiencia de calidade". Ademais, deben buscar a proposta máis adecuada para cada local e o seu horario.