Medio ambiente
O Plan Básico Autonómico deixa sen protección os espazos naturais da Galiza

A Xunta de Galicia vén de aprobar un plan único de ordenación do territorio para as catro provincias no que “se tentará ordenar o urbanismo nos concellos que non teñan un Plan Xeral de Ordenamento Municipal (PXOM)” segundo as declaracións do presidente Alberto Núñez Feijóo. “Trátase de ter un marco legal para alguén que queira facer unha casa no rural ou unha empresa que queira instalarse en concellos pequenos” indica Feijóo.

Alegacións ó PBA

“O Plan Básico Autonómico é unha normativa xenérica e desfasada que favorece os baleiros legais e a destrución do patrimonio” di Ana Varela, secretaria da asociación ecoloxista Petón de Lobo. “Unha forma de controlar e centralizar as políticas urbanísticas do territorio galego” indica.

Durante o transcurso do ano pasado foron moitas as plataformas medioambientais que lle solicitaron á Dirección Xeral de Calidade Ambiental da Consellería de Medio Ambiente e Ordenación do Territorio a necesidade de incorporar os Espazos Naturais Protexidos nos Planeamentos das Provincias de A Coruña, Lugo, Ourense e Pontevedra. “Ningunha destas solicitudes se tivo en conta por parte da Xunta” denuncian dende A Ría Non Se Vende.

A Ría Non Se Vende considera que o PBA facilita a desprotección de espazos naturais porque non contempla as normativas anteriores. “Miles de hectáreas que figuraban no Rexistro Xeral de Espazos Naturais de Galicia quedarán sen protexer”, declaran. Dende os colectivos ecoloxistas inciden en que “a posta en vigor do PBA implica a desaparición das Normas Complementarias e Subsidiarias de Planeamento nas que figuraban os espazos protexidos. Esta normativa non se substitúe por outra, simplemente desaparece” engaden desde ARNV. “ O PBA é un roubo de competencias urbanísticas nos concellos de menos de cinco mil habitantes” conclúen dende a asociación ecoloxista Petón de Lobo.

Segundo os colectivos Adega, Petón de Lobo e AEMS-Ríos con Vida, o PBA omite grande parte da rede fluvial galega. “No plan hai deficiencias relativas á identificación dos ríos en todos os concellos galegos agás en cinco da provincia de Pontevedra”, indican. “Non contempla a realidade física porque está cheo de erros topográficos, só se centra nos núcleos de poboación e de mala maneira”, di Ana Varela dende Petón de Lobo.

A Federación Ecoloxista Galega insiste na necesidade de acometer unha remodelación da planificación territorial na que se inclúa a avaliación ambiental do conxunto do territorio e a ordenación sustentable do solo en relación coa base económica da Galiza.

Crónica dunha morte anunciada: Dende o Rexistro Xeral até o PBA

O Rexistro Xeral de Espazos Naturais de Galicia naceu a finais da década dos oitenta ao abeiro da lei estatal 4/89 sobre a Conservación de Espazos Naturais. Por vez primeira regúlase a figura de Espazo Natural en réxime de Protección Xeral no territorio galego.

As Normas Complementarias e Subsidiarias de Planeamento nas catro provincias entran en vigor a comezos dos anos noventa incluíndo definición, cartografía e normativa dos espazos naturais protexidos pertencentes ao Rexistro Xeral. Esta normativa non autoriza a construción de edificacións permitindo a explotación racional dos recursos vinculados ao medio “sen atentar contra os valores esenciais que se protexen”.

Durante o mandato de Manuel Fraga créase a Rede Galega de Espazos Protexidos a partir da Rede Natura 2000 sen contemplar o Rexistro Xeral de Espazos Naturais de Galicia. Finalmente o goberno de Feijóo acaba de poñer en marcha o Plan Básico Autonómico.“As distintas normativas aprobadas pola Xunta de Galicia dende a década dos noventa até hoxe foron eliminando áreas protexidas e incluso chegaron a omitir espazos naturais que figuraban no primeiro rexistro”, declaran dende A Ría Non Se Vende. A plataforma denuncia “a mala xestión da Xunta ao longo dos últimos anos suxeita a intereses políticos e empresariais que culminan co Plan Básico Autonómico. Esta lexislación facilita a autorización de proxectos urbanísticos e industriais a través dun modelo especulador e insustentable”, declaran. “Detrás da desproteción ambiental está a destrución do territorio que dana irreversiblemente o patrimonio, todo isto produto dunha política de planificación territorial inapropiada”, rematan. “O fin que persegue a Xunta é o control urbanístico do territorio compatibilizándoo coa Lei de Depredación (Lei 5/2017) aprobada o ano pasado” indican dende Petón de Lobo.