Laboral
O paro baixa en Galiza un 1,2% en marzo e a Seguridade Social supera o millón de afiliados

O mercado laboral galego consolidou en marzo a súa tendencia positiva cunha dobre mellora: o paro baixou e a afiliación á Seguridade Social medrou. Así o reflicten os datos publicados este luns polos ministerios de Traballo e de Inclusión, Seguridade Social e Migracións.

O desemprego rexistrado nas oficinas dos servizos públicos de emprego descendeu en 1.388 persoas o pasado mes (-1,2%), situando o total en 114.670 parados. En termos interanuais, a caída é aínda máis significativa: hai 4.485 desempregados menos que hai un ano, o que supón unha redución do 3,76%.

Por provincias, a baixada produciuse en tres das catro demarcacións galegas. Pontevedra rexistrou o maior descenso en termos relativos (-1,54%), ata os 43.718 parados, seguida de Lugo (-1,49%, con 11.607) e A Coruña (-1,21%, ata 45.151). A única excepción foi Ourense, onde o paro repuntou levemente un 0,16%, con 22 desempregados máis, ata os 14.194.

Por sectores, a redución concentrouse nos servizos, que acapararon a maior parte da caída con 1.136 parados menos, aínda que tamén descendeu en construción (-240), industria (-75) e agricultura (-13). O único colectivo que aumentou foi o de persoas sen emprego anterior, con 76 novos rexistros.

Máis contratos e un millón de cotizantes

En paralelo, a contratación experimentou un notable impulso. En marzo asinaron 57.370 contratos en Galiza, case 9.000 máis que en febreiro (+18,52%) e máis de 5.300 por riba do mesmo mes do ano anterior (+10,18%). Deles, 19.317 foron indefinidos e 38.053 temporais.

A outra cara da moeda ofrécela a afiliación á Seguridade Social, que superou o millón de cotizantes na comunidade. En concreto, Galiza gañou unha media de 7.644 afiliados en marzo respecto ao mes anterior, situando o total en 1.095.875, un 1,53% máis que hai un ano, con 16.479 cotizantes adicionais.

Por réximes, 874.539 afiliacións corresponden ao réxime xeral, 203.879 ao de autónomos e 17.457 a traballadores do mar.

O Estado español supera os 22 millóns de afiliados

No conxunto do Estado, o paro baixou en 22.934 persoas en marzo respecto a febreiro (-0,9%), case o dobre que no mesmo mes de 2025, impulsado fundamentalmente polo sector servizos. A Seguridade Social, pola súa banda, sumou unha media de 211.510 novos cotizantes no mes, coa hostalaría como principal motor ante as contratacións de cara á Semana Santa.

O fito do mes foi a superación dos 22 millóns de afiliados a nivel nacional. A ministra de Inclusión, Elma Saiz, destacou que se trata dun “fito histórico” acadado tras sumar 2,2 millóns de empregos desde a reforma laboral e 3,3 millóns desde 2018.

En materia de prestacións, e con datos de febreiro —que sempre se publican cun mes de atraso—, o gasto en Galiza ascendeu a 104,3 millóns de euros, cunha prestación contributiva media que superou por primeira vez os mil euros por beneficiario (1.000,6 euros/mes).