Galego
Máis de 50 entidades galegas únense este sábado en Santiago para frear a emerxencia lingüística do galego

Máis de cincuenta organizacións sociais de Galiza, baixo o paraugas de Queremos Galego, concentraranse este sábado 14 de marzo ás 12h na Praza da Quintana de Santiago de Compostela para celebrar a asemblea ‘Lingua Vital’, un acto reivindicativo no que presentarán un protocolo de medidas urxentes ante o que describen como unha situación de emerxencia para a lingua galega.

O documento, que se distribuirá entre todos os asistentes, parte dos obxectivos do Plan Xeral de Normalización Lingüística e busca comprometer ás institucións públicas con accións concretas para reverter o declive do galego. “Xa pasou o ecuador da lexislatura sen que o Goberno galego movese o máis mínimo para cambiar o rumbo negativo da lingua”, denunciou Marcos Maceira, portavoz de Queremos Galego.

Entre as medidas propostas destaca a creación dunha avaliación de impacto lingüístico para todas as normas aprobadas polo Parlamento de Galiza, co obxectivo de evitar disposicións que menoscaben a oficialidade do galego. Ademais, o protocolo aposta por unha colaboración activa entre entidades sociais e institucións para ampliar a presenza do galego en todos os ámbitos da vida pública e cotiá.

A coordinadora da plataforma, Celia Armas, foi directa ao sinalar a inacción da Xunta: “Se non está facendo o seu traballo, vémonos obrigadas a facelo nós”. E engadiu con ironía que se o Goberno autonómico copiase íntegramente o protocolo, consideraríano “o maior éxito”.

O acto contará con actuacións musicais de Caamaño e Ameixeiras, intervencións de representantes dos grupos de traballo que elaboraron os protocolos e a participación de David Minoves, presidente do Centre Internacional Escarré per les Minories Ètniques i Nacionals (Ciemen), que expresará o seu apoio internacional ás medidas propostas. A asemblea concluirá coas palabras de Maceira e a proxección dun vídeo que resumirá o percorrido do proceso ‘Lingua Vital’.