Energías renovables
A Xunta manobra para cambiar a lei tras sete proxectos eólicos paralizados pola xustiza

O Goberno galego de Alfonso Rueda quere cambiar as normas do xogo. Tras varios e consecutivos reveses xudiciais debidos a irregularidades na forma de tramitación dos polígonos eólicos en Galiza, o proxecto de lei destinado a acompañar os orzamentos da Xunta para o próximo ano recolle unha proclamación de interese público “de máxima importancia” no que respecta á planificación, construción e operación de parques eólicos baixo a xurisdición autonómica. A efectos prácticos, a fin última desta manobra política supón facilitar ás empresas as autorizacións para a creación de máis polígonos e, polo tanto, reducir significativamente os custos das multinacionais cando os procesos de construción se dilatan por medidas cautelares adoptadas pola Xustiza. Todo despois de que os recursos das organizacións ecoloxistas de referencia no país conseguiran o amparo da sección terceira da Sala do Contencioso-Administrativo do Tribunal Superior de Xustiza de Galicia (TSXG), que xa paralizou cautelarmente sete proxectos.

A guerra do vento

Javier H. Rodríguez

Medio ambiente

Medio ambiente A guerra do vento

Javier H. Rodríguez

Fracturas sociais e fendas medioambientais na implantación descontrolada da enerxía eólica en Galiza.

MEDIO AMBIENTE A veciñanza de Antas busca parar o parque eólico de Monte Peón por defecto de tramitación

En situacións nas que surxa unha apelación administrativa contra as accións de autorización dun proxecto de parque eólico ou as súas correspondentes infraestruturas de evacuación, e se solicite a suspensión da execución da acción impugnada, “deberase ter en conta o disposto neste artigo ao sopesar a ponderación que debe levarse a cabo conforme ao establecido na lexislación de procedemento administrativo”, presume o executivo galego.

Esta recente modificación incorporada pola Xunta, a través da lei de medidas fiscais e administrativas, ten lugar nun contexto no que diversos promotores de enerxía eólica están impulsando múltiples parques en Galiza, algunhas das cales se atopan nun estado de suspensión debido a recursos presentados por organizacións ambientais como Adega, Ecoloxistas en Acción e organizacións veciñais de persoas afectadas.

De maneira específica, o proxecto de lei que agora se atopa en proceso de tramitación polo Parlamento inclúe esta declaración de interese público “de máxima importancia” no que respecta á planificación, construción e operación de parques eólicos baixo a xurisdición autonómica, así como das súas correspondentes infraestruturas de evacuación. “Esta declaración abrangue os seus procesos de autorización, construción e posta en funcionamento”, menciónase.

A lei de acompañamento da Xunta resalta que “se asumirá que se trata de proxectos de interese público superior e que contribúen á saúde e á seguridade pública, conforme ao previsto no artigo 3 do mencionado regulamento”. Ademais, sinala que esta disposición aplicarase “a procedementos de autorización que se inicien despois do 30 de xuño de 2024, cando así o determine a lexislación da Unión Europea”.

Un dos artigos establece a ponderación deste interese público superior, no sentido de que “supón a presunción de que as actividades mencionadas responden a este interese público superior e contribúen á saúde e seguridade públicas, polo que esta presunción terase en conta como un elemento relevante ao avaliar os intereses legais de cada caso no proceso de planificación, outorgamento de autorizacións e posta en funcionamento, a menos que existan probas en sentido contrario e sen prexuízo das regulacións que poidan determinar a ponderación de outros intereses en situacións específicas”. A Consellería de Industria asumirá a responsabilidade de monitorizar os efectos no medio ambiente dos parques eólicos en construción co fin de identificar de maneira pronta “os posibles efectos adversos non previstos” e tomar medidas para previr eles.

Os ecoloxistas din que a Xunta quere satisfacer ao lobby eólico

“A profusión coa que a Xunta usa a Lei de medidas fiscais e administrativas que acompaña aos orzamentos de cada ano para modificar pola porta de atrás e sen debate un feixe de normas que pouco o nada teñen a ver coas finanzas, supón un déficit democrático e un síntoma inequívoco de mala xestión”, denuncian fontes da Asociación para a Defensa Ecolóxica de Galiza (Adega). Explica que, na fin, o que resultará deste cambio normativo é “máis inseguridade xurídica”.

“A Xunta pretende xustificar esta medida aludindo a un Regulamento (UE) 2022/2577 do Consello, para acelerar o despregamento das renovábeis. Esta consideración debe terse en conta nos procedementos de avaliación ambiental de xeito que de entrada os parques eólicos considéranse compatíbeis salvo argumento en contra. Será a cidadanía, xa que logo, a encarregada de probar a afección a hábitats, especies, servizos ecosistémicos, paisaxe, patrimonio, etc. que viren incompatíbel determinado proxecto”, alertan dende a organización.