Economía
A economía social e solidaria reivindícase en Santiago como alternativa real ao modelo económico actual

A Facultade de Ciencias Económicas e Empresariais da Universidade de Santiago acolleu o pasado 10 de abril o encontro Da utopía á realidade, organizado por REAS Galizcia, unha xornada que reuniu profesionais do ámbito educativo, da cooperación, do terceiro sector e doutras entidades vinculadas á economía social e solidaria (ESS).

O evento serviu como punto de encontro para reflexionar sobre o papel desta economía alternativa ante os retos actuais e fortalecer redes de colaboración nun contexto marcado pola necesidade de construír modelos máis xustos e sostibles. Ao longo da mañá, desenvolvéronse diversas mesas de debate centradas na visibilización da ESS, a súa incorporación ao ámbito educativo e o seu potencial como resposta ao sistema económico dominante.

A presidenta de REAS Galicia, Ana Lorenzo, subliñou durante a xornada a necesidade de construír modelos económicos que non impliquen impactos negativos no planeta nin nas relacións sociais, mentres que Eba Armendariz, de Economistas Sen Fronteiras, puxo o foco na importancia de equilibrar as dimensións económica, social e ambiental, en liña cos obxectivos da Axenda 2030.

Un dos eixos centrais do encontro foi a medición do impacto real da economía social e solidaria. Neste sentido, destacouse o papel da Auditoría Social como ferramenta clave para avaliar o traballo das entidades, garantir a transparencia e xerar confianza tanto a nivel social como institucional. Tamén se reivindicou a necesidade de que este tipo de mecanismos sexan recoñecidos na contratación pública como un criterio máis de calidade.

Xa pola tarde, a xornada transformouse nun espazo práctico de innovación coa posta en marcha do Atlas Colectivo e varios grupos de traballo colaborativos. Estas dinámicas permitiron analizar a auditoría social desde unha perspectiva inclusiva e en conexión cos Obxectivos de Desenvolvemento Sostible (ODS), así como avanzar no desenvolvemento dun selo de garantía da ESS en Galiza.

Este selo pretende converterse nun instrumento de transparencia e recoñecemento, facilitando tanto o consumo responsable por parte da cidadanía como a contratación pública por parte das administracións. Ademais, o proceso permitiu identificar tanto fortalezas como limitacións na medición do impacto no contexto galego, especialmente no ámbito rural e na diversidade de sectores implicados.

A xornada concluíu cunha posta en común das principais achegas dos grupos de traballo, nas que se reafirmou a Auditoría Social como unha ferramenta estratéxica que vai máis alá da avaliación, ao permitir visibilizar o valor do traballo desenvolvido polas entidades da ESS.

Desde REAS Galicia apostan por dar continuidade a este proceso mediante a creación dun grupo de traballo específico e reforzar a súa vinculación coa Axenda 2030. O encontro pechouse cunha mensaxe clara: a economía social e solidaria non só é necesaria, senón urxente, como vía para construír un modelo máis xusto, sostible e centrado nas persoas.

Guía de conexión da Auditoría Social cos ODS

Este encontro enmárcase no peche do proxecto Recoñece a ESS, unha iniciativa que naceu co obxectivo de facer a Economía Social e Solidaria máis medible, visible e recoñecida, e que traballou para mellorar a coherencia interna das entidades mediante ferramentas como a Auditoría Social, conectar os principios da ESS cos ODS e reforzar a comunicación do seu valor transformador. Como continuidade deste proceso, REAS Galicia convida a participar nun encontro en liña aberto o martes 21 de abril ás 12.30h, no que se presentarán os resultados do proxecto e a Guía de conexión da Auditoría Social cos ODS, unha ferramenta práctica para avanzar na medición e comunicación do impacto.