Deportes
As Nosas: “Ver mulleres subindo a un podio e acadando éxitos empodera”

Falamos con Silvia Carregal sobre o nacemento do xornal deportivo As Nosas, un medio necesario para facer visible o deporte feminino xeralmente ignorado polos medios máis convencionais. Silvia cóntanos a idea tras deste proxecto así como o porqué do seu lema: Informar, visibilizar e empoderar.

Que é As Nosas e por que xorde este xornal?
A idea de pór en marcha un xornal sobre deporte feminino en Galicia xurdiu na redacción de Ártabra Comunicación, que é a empresa editora. Entre as persoas que conformamos o equipo hai varias con traxectoria como xornalistas deportivas, e a sensibilidade sobre cuestións de xénero é tamén un punto en común de todas nós. Así que sumando dúas e dúas, xurdiu. Somos comunicadoras. O que sabemos facer é comunicar, cada quen suma coa súa especialidade: redactando texto, tomando fotos ou gravando e editando vídeos, incluso o departamento de deseño gráfico aportou artellando un logotipo que cremos que nos define moi ben.

A sensibilidade sobre cuestións de xénero é un punto en común de todas nós

Por que é fundamental un xornal de deporte onde as mulleres son as protagonistas?
O máis importante de todo é que exista un xornal que faga visible o deporte feminino. Que haxa unha maioría de mulleres na redacción é bastante común en moitos medios, é certo que non tanto nos deportivos, pero por sorte iso está cambiando. Cando eu empecei no xornalismo foi precisamente cubrindo información deportiva, que sempre foi a miña paixón. Daquela eramos moi poucas, nunca entendín o motivo. Pero para min o importante é que se conte, e que se faga ben. 

Informar, visibilizar e empoderar: pódesnos contar algo máis sobre estas tres ideas bases de As Nosas?
Consideramos que é preciso informar por que as deportistas son noticia. Non se está a relatar con suficiente énfase, de aí a necesidade de facelo visible. Estamos, existimos, formamos parte do deporte, logo é natural que se nos vexa. E a terceira das cuestións, o empoderamento, vén dada pola posta en valor. Se se nos ve, se informamos sobre a muller e o deporte, se damos conta dos seus éxitos e logros, o camiño natural debera ser que a muller tomase consciencia de que é protagonista, de que acada logros e que é válida para moitos roles que non sempre se lle asignan. O deporte, ademais, é moito de marcarse metas e alcanzar obxectivos. Ver mulleres subindo a un podio, levantando trofeos e acadando éxitos empodera.

Téndese a pensar que o deporte feminino está destinado a un público feminino, pero isto é así?
Non é certo, pódese ver nos recintos deportivos. E, pola parte que nos toca, estámolo a comprobar a través das estatísticas. Aínda que é cedo para tirar conclusións sobre os datos das visitas, ata o de agora o xénero vai parello, incluso está a ser un chisco máis alto entre os homes. Diciamos na nosa presentación que Nosas é un xornal deportivo pensado para darlles o protagonismo que reclaman e merecen as mulleres no deporte en Galiza. Pero que, sendo un medio no que as mulleres son as protagonistas, está dirixido a toda a sociedade galega, non só ao segmento feminino. Cremos que o deporte ten un público desexoso de consumir información máis aló do xénero de quen o practique. O deporte é deporte. Se te fixas, palabras como futbolista, haltera, ou atleta non teñen xénero.

Cremos que o deporte ten un público desexoso de consumir información máis aló do xénero de quen o practique

Pensades que o deporte feminino cada vez ten máis visibilidade? Credes que esta tendencia vai seguir mudando para mellor?
Nos últimos anos déronse pasos moi grandes no camiño da igualdade e na visibilidade. Pero aínda fica moito camiño por andar. Isto é unha maratón, unha proba de longo percorrido. Sería complicado pensar que se pode mudar de golpe algo que constitúe un cambio social e cultural. Son conceptos que temos no imaxinario común e que temos que mudar xuntos como sociedade. Está a pasar no deporte igual que está a acontecer noutros ámbitos da sociedade. Só pode ir a mellor porque non hai marcha atrás.