Culturas
A Deputación da Coruña e a de Lugo asinan un acordo sen precedentes co CCG para espallar a cultura polo rural

A Deputación da Coruña, a de Lugo e máis o Consello da Cultura Galega seleron esta mañá as súas firmas para poñer en marcha Escola, cultura e territorio, un proxecto conxunto que quere dar a coñecer e apoiar as experiencias culturais que se desenvolven no rural galego. A rúbrica do convenio correu a cargo da deputada de Cultura da Deputación da Coruña, Natividade González; da súa homóloga na Deputación de Lugo, Iria Castro; e da presidenta do Consello da Cultura Galega, Dolores Vilavedra.

As tres institucións comparten unha mesma lectura de fondo: a cultura como motor para fortalecer a identidade colectiva, tecer comunidade e conservar a memoria. Baixo esa idea, a iniciativa quere achegar, dar valor e poñer en contacto experiencias que crucen educación, cultura e territorio, coa fin de dinamizar social e culturalmente as zonas rurais do país.

Seis actividades repartidas entre as tres entidades

O programa concrétase en seis accións formativas e de visibilización. A primeira delas terá lugar xa o próximo luns 13 de xullo: o Encontro de Boas Iniciativas Culturais, organizado pola Deputación de Lugo no Pazo de Tor (Monforte de Lemos), que reunirá a uns vinte colectivos e profesionais do sector cultural.

A Deputación da Coruña, pola súa parte, ten previsto poñer en marcha a finais de ano unhas residencias de proxectos culturais no Pazo de Mariñán, xunto cun programa dirixido ao traballo cultural coa mocidade na Costa da Morte. Mentres tanto, o Consello da Cultura Galega achegará ao proxecto un programa de formación en materia cultural destinado a cargos públicos e unha ferramenta dixital para dar visibilidade a proxectos aliñados coa filosofía de Escola, cultura e territorio.

Unha colaboración sen apenas precedentes

Natividade González puxo o acento na relevancia de sumar esforzos institucionais para que as políticas culturais cheguen a todo o territorio e para que o rural se afiance como lugar de creación, participación e transmisión do patrimonio, tanto material como inmaterial. Nas súas palabras: “Trátase dunha iniciativa pioneira de colaboración institucional que evidencia o compromiso compartido das administracións coa cultura e co territorio. Non existen practicamente precedentes de cooperación entre dúas deputacións galegas para impulsar unha iniciativa cultural destas características, polo que este convenio supón un paso importante na suma de esforzos e recursos para desenvolver proxectos de interese común”.

Dende a Deputación de Lugo, Iria Castro puxo en valor a posibilidade de sumar forzas malia partir de realidades distintas: “de traballar conxuntamente para fortalecer o ecosistema cultural galego desde o ámbito local, tendo en conta que cada institución atende realidades demográficas e socioeconómicas diferentes. Nas comarcas de Lugo, cunha poboación dispersa e un territorio maioritariamente rural, agroman proxectos moi interesantes dos que aprender. Este marco de colaboración co Consello da Cultura Galega e da Deputación da Coruña danos a oportunidade de proxectar o seu traballo e de canalizar e documentar a súa experiencia para transladala a outros ámbitos”.

Pola súa banda, a presidenta do Consello da Cultura Galega, Dolores Vilavedra, definiu o acordo como “un exemplo modélico de colaboración institucional para impulsar políticas culturais que cheguen a todo o conxunto do territorio e superar as asimetrías que existen entre o rural e o urbano, reforzando o papel do rural como un espazo activo, dinámico, de memoria”. Vilavedra engadiu que o convenio permite “deseñar unha folla de ruta que xorde dunha convicción: a cultura é unha ferramenta de cohesión social”.