Culturas
O cooperativismo e a xestión comunal do monte danse a man nun microfestival en Gondomar

Festa Raxada celébrase este fin de semana en Couso, no Concello de Gondomar. Detrás da iniciativa está a Sociedade Cooperativa Galega A Casa das Redes, que xunto á comunidade de montes local impulsa un microfestival arraigado no territorio: música en directo, actividades escénicas, talleres, rutas e espazos de encontro, todo nun entorno rural ao aire libre.

A aposta é clara dende o principio: un festival feito dende o cooperativismo e para a comunidade. Non é un evento chegado de fóra, senón construído dende dentro, coa veciñanza e co respecto á contorna como protagonistas. “A cultura constrúese dende o común, o coidado e a diversidade”, sinala a organización, que entende a música e as artes como ferramentas para tecer redes e habitar o territorio con respecto e sensibilidade.

A programación musical arrinca este venres 12 de xuño ás 20.30h con Os Pataghullos e prolóngase até as catro da madrugada con The Gotxos Party, pasando por Antimums, High Paw e Seitura. O sábado trae seis actuacións principais, con Mercedes Peón abrindo a tarde ás 19:00, seguida de Brassica Rapa, Neta Ruffina, Sun Iou, Xente Tóxica e DJ Rapante. Entre concerto e concerto, os DJs Quinito, Kimera e MDS manterán o ambiente nas zonas habilitadas. O domingo, con ton máis tranquilo, pecha o festival cos Gaiteiros de Couso, Geles Alva e Baiona Bay.

O recinto principal é o campo de fútbol Alto de San Antoniño, que acolle os concertos, as barras e os espazos de encontro. O Bosque da Lingua servirá de escenario para actuacións de menor formato, e a Casa Veciñal de Couso abrirá o domingo para a sesión vermú. A piscina completa o mapa de espazos, con zona de ocio e aparcamento para caravanas e furgonetas.

Ao longo do sábado e o domingo haberá tamén feira artesá, rutas de sendeirismo, Teatro do Ar, Cabaret Drag, xantar popular e obradoiros infantís. A organización anuncia ademais a gravación dun podcast en directo con participación de algunhas bandas do cartel.

Como festival feminista, Festa Raxada conta cun Punto Lila e unha Brigada de Coidados, coordinados pola cooperativa Alalá, para velar polo benestar de todas as persoas asistentes e previr situacións de violencia. Tamén haberá un espazo de maquillaxe e expresión estética.

A autogestión está presente en todo o evento: barra autoxestionada con comida e supermercado cooperativo “Ultramarinos Josefa”, instalado no antigo Colmenar da Subiada. A produción técnica corre a cargo de Enrique (Goyplason) e Gustavo.

A programación destacada: