Altri
A Xunta comunica a Altri o arquivo definitivo da súa celulosa

A Consellería de Economía e Industria da Xunta de Galicia vén de lle comunicar a Altri o arquivo “definitivo e firme” do proxecto previsto para Palas de Rei (Lugo) ao considerar que as alegacións presentadas pola empresa lusa son “inadecuadas e insuficientes” e que a factoría é “inviable” nas condicións expostas.

Foi a propia conselleira, María Jesús Lorenzana, quen deu a coñecer a decisión este mediodía en declaracións aos medios. A responsable autonómica precisou que se trata dunha resolución administrativa e que, como en calquera outra, a empresa pode recorrer contra ela.

O expediente arrastra este desenlace desde febreiro, cando se abriu o proceso de arquivo por mor da falta de conexión eléctrica do proxecto: a subestación que precisaba quedara fóra da planificación eléctrica do Goberno central, algo que a Xunta considerou determinante para dar este paso.

A partir de aí, Greenfiber —filial de Altri en Galiza— dispuxo de tres meses para presentar alegacións e propor unha vía alternativa de conexión. A compañía chegou a facelo, xa case esgotado o prazo, argumentando que o proxecto contaría con “autosuficiencia enerxética”. Con todo, iso non foi abondo para que o Goberno galego frease o arquivo xa anunciado.

“Estas alegacións non as consideramos adecuadas ou suficientes para estimar o que pretenden, que é continuar co expediente. Polo tanto, vimos de resolver de modo definitivo e firme por parte da Xunta ese arquivo do expediente de Altri”, explicou Lorenzana.

Cuestionada sobre se a empresa trasladou a intención de presentar unha nova iniciativa, a conselleira asegurou non ter “coñecemento” diso. Pola contra, sinalou que o que busca Altri é seguir adiante co procedemento xa iniciado, o cal, lembrou, “ten unha solución técnica moi concreta”: a conexión coa subestación de Palas.

O problema é que esa infraestrutura non figura no borrador de planificación do Ministerio para a Transición Ecolóxica (Miteco), un documento xa “moi avanzado” e que o departamento estatal, segundo apuntou Lorenzana, prevé aprobar antes de que remate o ano.

“O que podo dicir é que o proxecto actual que está a tramitar a compañía é inviable por non ter esa conexión. O arquivo é definitivo”, insistiu. A conselleira lembrou ademais que a declaración de impacto ambiental (DIA) ten unha validez de catro anos, dos que xa transcorreu un enteiro, o que reduce aínda máis a marxe de manobra. “Este proxecto non ten moitas posibilidades, por non dicir ningunha, de saír adiante”, rematou.