Activismo
Medio cento de organizacións galegas convoca unha manifestación unitaria contra o imperialismo

Medio centenar de organizacións sociais, sindicais e políticas galegas convocaron unha manifestación unitaria contra o imperialismo, a guerra e o auxe do fascismo. A mobilización terá lugar o martes 3 de marzo de 2026 en Vigo, con saída desde Vía Norte con Urzáiz ás 19.30h.

Baixo o lema “Vigo pola paz e a democracia. Non ao fascismo”, a convocatoria fai un chamamento á cidadanía para defender os dereitos humanos, o dereito internacional e a soberanía dos pobos. O manifesto sitúa a mobilización nun “momento decisivo” a nivel global, marcado —segundo denuncian— pola normalización da guerra, o debilitamento dos organismos internacionais e o avance de discursos autoritarios.

Un dos eixos centrais do protesto será a defensa do pobo palestino. As entidades convocantes denuncian a continuidade da ofensiva sobre Gaza e cualifícana de xenocidio, criticando ademais a complicidade ou pasividade das grandes potencias e da Unión Europea. No texto aseguran que “defender a Palestina é defender a humanidade enteira” e sosteñen que as guerras actuais non son feitos illados, senón síntomas dun “colapso moral e político global”.

O manifesto rexeita a impunidade ante os crimes de guerra, o incremento do gasto militar e a consolidación dunha cultura belicista. Tamén advirte do crecemento de forzas fascistas en Europa, América e países árabes, que —afirman— aproveitan o medo e a desigualdade para recortar liberdades e dereitos.

As organizacións convocantes apelan a unha mobilización “cívica, plural, inclusiva e solidaria” e chaman á cidadanía galega a saír á rúa para esixir o fin das guerras e frear o avance do fascismo. “Salvar a humanidade é urxente. Parar as guerras é posíbel. Frear ao fascismo, un deber democrático e ético”, conclúe o texto.

As organizacións convocantes son Amigas das Árbores, Amigas da Terra, Acción Verapaz, As Ningunhas, Asociación Cidade Fernando Hoyos, Asociación Galega en Defensa da Sanidade Pública, Ateneo Atlántico, AVV Calvario, AVV Lavadores, BNG, CCOO, CIG, CGT, Colectivo Cultural Pertenza, Colectivo Recurdir, Comisión Cidadá Palestina, Comunidade de Montes de Lavadores, CUT, Diem25, Distopías18, Ecoloxistas Galicia Atlántica e Verde, Esquerda Unida, Federación AAVV FECAV, FOANPAS, Foro Cívico, Greenpeace, HOAC, Lucenza-Ateneo de Nigrán, Memoria, Verdade e Xustiza, MODEPEN, Movemento Sumar Galicia, Ollo de Falcón, Parar a Guerra, Oxfam-Intermón, Parroquia Cristo da Vitoria, PCG, PGP, Plataforma Somos Elas Galicia, Podemos, PSdeG-PSOE, Recortes Cero, Sindicato de Inquilinas, STEG, UGT, Un Mundo sen Guerras e sen Violencia, Verdes EQUO, Xustiza e Sociedade.