Activismo
A Comunidade de Montes de Tameiga vence ao Celta de Vigo e frea a construción dun centro comercial e un estadio

O pasado domingo 26 de xaneiro, os comuneiros e comuneiras de Tameiga (Mos, Pontevedra), aprobaron en asemblea un acordo histórico. Conseguiron torcerlle o brazo ao Celta de Vigo e negociado que a empresa free a construción dun centro comercial, un pavillón, un estadio para 5.000 persoas e un enorme aparcadoiro nos seus terreos mancomunados.

Tras sete anos de loitas incesantes, a Comunidade de Montes e Veciños en Man Común de Tameiga votou maioritariamente a favor da nova delimitación do proxecto coñecido como GS360 da empresa de Marián Mouriño no que afecta os terreos da parroquia. A directiva chegara a un preacordo co Celta que o pasado domingo foi ratificado polo órgano decisor da comunidade: a asemblea dos veciños e veciñas comuneiras.

A Confederación Hidrográfica sancionará ao Celta polas verteduras da súa cidade deportiva declarada ilegal

Javier H. Rodríguez

Contaminación

Contaminación A Confederación Hidrográfica sancionará ao Celta polas verteduras da súa cidade deportiva declarada ilegal

Javier H. Rodríguez

A investigación chega grazas á vixilancia de Ecoloxistas en Acción na zona onde se sitúa o recinto, en Mos, na comarca de Vigo.

Galiza O Goberno tomba o intento da Xunta de regularizar a cidade deportiva do Celta declarada ilegal

Este acordo establece que o Celta renuncia a ocupar chan de Tameiga en case toda a súa totalidade. Das máis de 150 hectáreas ameazadas polo proxecto GS360 ao comezo do proxecto, o club finalmente quedará cun total de apenas 1,5 hectáreas de propiedade comunal: arredor dun 1% do exposto. Destas, unha hectárea corresponde á parcela actualmente ocupada polas instalacións de Viveiros Adoa. Os 5.000 metros cadrados restantes estarán destinados á ampliación dun tramo da estrada contigua (EP-2605) e á construción de dúas rotondas.

Ademais, a non ocupación dos terreos forestais en Tameiga reduce drasticamente as afectacións a varias traídas de auga inicialmente prexudicadas, unha reclamación prioritaria para as veciñas e veciños desta parroquia de Mos.

“Para nós, é un gran logro”, celebraba o domingo o presidente da Comunidade de Montes, César Lago, que engadía: “Tras sete anos de mobilización veciñal, conseguimos preservar o monte comunal e protexer as traídas de auga que abastecen a unhas 5.000 persoas”. “A partir de agora, seguiremos traballando para que as obras do Celta afecten o menos posible tanto á cantidade de auga dispoñible como á súa calidade”, remataba.

Coa aprobación da proposta por parte dos veciños comuneiros de Tameiga, a Comunidade de Montes non continuará coas accións legais contra o Celta e o proxecto GS360, a cambio de que o club de fútbol vigués comprométase a non ocupar nunca no futuro terreos do monte veciñal de Tameiga.