Activismo
Centos de persoas conseguen frear o acto de Vox en Santiago de Compostela

Varios centos de persoas, convocadas por preto de vinte colectivos antifascistas, impediron un acto de Vox en Santiago no que tiña previsto participar o xefe da delegación de Vox na Unión Europea e coñecido propagandista de extrema dereita, Jorge Buxadé. O sucedido provocou tensión ás portas do centro sociocultural de Santa Marta, que permaneceu pechado despois de que máis de 50 mozos e mozas se encerrasen a media tarde para evitar que o acto se celebrase.

Con berros como “aquí non pasa Vox”, “aquí están os antifascistas” ou “ningunha persoa é ilegal”, centos de persoas concentráronse fronte a este centro cultural compostelán para amosar o seu rexeitamento ao evento da extrema dereita española. Despregouse un dispositivo policial que mantivo separados, sen incidentes, aos manifestantes e aos simpatizantes de Vox.

Nas súas declaracións aos medios, Buxadé responsabilizou ao presidente do Goberno, Pedro Sánchez, de que se dean este tipo de concentracións, e criticou tamén á alcaldesa de Compostela, Goretti Sammartin (BNG), por “pechar” as instalacións, que son de titularidade municipal.

Pouco despois, cando a concentración comezaba a disolverse, produciuse un enfrontamento entre un grupo de manifestantes e os axentes, o que derivou nunha carga policial. Finalmente, os asistentes á convocatoria abandonaron os arredores do centro sociocultural de Santa Marta pouco despois de caer o sol.